பயமில்லாமல் தேர்வு எழுதுங்கள்: பிளஸ் 2 மாணவ, மாணவிகளுக்கு அமைச்சர் தங்கம் தென்னரசு கடிதம்

பிளஸ் 2 மாணவ, மாணவிகள் தங்கள் பாடங்களை நன்றாக படித்து பயமில்லாமல் நம்பிக்கையுடன் தேர்வு எழுத வேண்டும் என பள்ளிக்கல்வித்துறை அமைச்சர் தங்கம் தென்னரசு மாணவ, மாணவி களுக்கு கடிதம் எழுதுகிறார்.

கடந்த ஆண்டு பிளஸ் 2 மற்றும் எஸ்.எஸ்.எல்.சி. பொதுத்தேர்வு எழுதிய மாணவ, மாணவிகளுக்கு பள்ளிக்கல்வித் துறை அமைச்சர் தங்கம் தென்னரசு தனித் தனியே கடிதம் எழுதினார். அக்கடிதத்தில் பொதுத் தேர்வினை நல்ல முறையில் பயமில்லாமல் எழுத வேண்டும் என்றும், பிளஸ் 2 மாணவ, மாணவிகளுக்கு இது வாழ்க்கையின் திருப்பு முனையாக அமைவதால் மிக கவனத்துடன் தேர்வினை எழுதி வெற்றி பெற வேண்டும் எனவும் வாழ்த்தும், அறிவுரையும் கூறியிருந்தார்.

இக்கடிதம் மாவட்ட பள்ளிக் கல்வித்துறை மூலம் அனைத்து பிளஸ் 2 மற்றும் எஸ்.எஸ்.எல்.சி. மாணவ, மாணவிகளுக்கு அனுப்பி வைக்கப்பட்டது.

இந்த ஆண்டு மார்ச் மாதம் முதல் தேதியில் பிளஸ் 2 தேர்வு தொடங்குகிறது. இந்த ஆண்டும் பிளஸ் 2 மாணவ, மாணவிகளுக்கு அமைச்சர் தங்கம் தென்னரசு கடிதம் எழுதுகிறார். இக்கடிதத்தில், மாணவ, மாணவிகள் நன்றாக படித்து பயமில்லாமல் நம்பிக்கையுடன் பொதுத் தேர்வினை எழுத வேண்டும் என்று அறிவுரை கூற இருக்கிறார். இந்த கடிதம் மாவட்ட கல்வி அலுவலகம் மூலம் அனைத்து பிளஸ் 2 மாணவ, மாணவி களுக்கும் அனுப்பி வைக்கப்பட உள்ளது.

ஆசிரியர்கள் பிளஸ் 2 மாணவ, மாணவிகளுக்கு தேர்வு வரும் வரை முடிந்த வரை அனைத்து உதவிகளை யும் செய்து அவர்களை தேர் வில் வெற்றி பெறச் செய்ய வேண்டும் என்றும் அமைச்சர் தங்கம் தென்னரசு கேட்டுக் கொண்டுள்ளார்.

மேலும் இந்த ஆண்டு பிளஸ் 2 பொதுத் தேர்வுக்கான மையங்கள் அதிகப்படுத் தப்பட்டுள்ளது. இதனால் மாணவ, மாணவிகள் பொதுத் தேர்வு எழுதுவதற்கு அதிக தூரம் செல்ல வேண்டிய நிலை இருக்காது என்றும் அமைச்சர் தங்கம் தென்னரசு தெரிவித்துள்ளார்.